Lyrics - Awa Whigs Awa

Our thrissles flourish'd fresh and fair,
And bonie bloom'd our roses,
But Whigs cam like a frost in June,
An wither'd a our posies.

Chorus:
Awa, Whigs, awa!
Awa, Whigs, awa!
Ye're but a pack o traitor louns,
Ye'll do nae guid at a'.

Our ancient crown's fa'n in the dust,
Deil blin' them wi the stoure o't,
An write their names in the black beuk,
Wha gae the Whigs the power o't!

Chorus

Our sad decay in church and state,
Surpasses my descriving,
The Whig cam o'er us for a curse,
An we hae done wi thriving.

Chorus

Grim Vengeance lang has taen a nap,
But we may see him waukin,
Gude help the day when Royal heids,
Are hunted like a maukin!

Chorus