Oh! the auld hoose, the auld hoose,
What tho' the rooms were wee,
Oh, kind hearts were dwelling there,
And bairnies fu' o' glee.
And wild rose and the jessamine
Still hang upon the wa'
Hoo mony cherished memories
Do they sweet flow'rs reca'.
Oh, the auld laird, the auld laird,
Sae canty, kind and crouse:
How mony did he welcome
To his ain wee dear auld hoose.
And the leddy too, sae genty,
There shelterd Scotland's heir,
And clipt a lock wi' her ain hand
Frae his lang yellow hair
The mavis still doth sweetly sing,
The blue bells sweetly blaw;
The bonnie Barn's clear windin' still,
But the auld hoose is awa'.
The auld hoose, the auld hoose,
Deserted tho' ye be,
There ne'er can be a new hoose
Will seem sae fair to me.
Still flourishin' the auld pear tree.
The bairnies liked to see;
And oh! how aften did they spier
When ripe they a' wad be.
The voices sweet, the wee bit feet,
Aye rinnin' here and there;
The merry shout — oh! whiles we greet
To think we'll hear nae mair!
For they are a' wide scatter'd now.
Some to the Indies gane;
And ane alas! to her lang hame,
Not here we'll meet again.
The kirk yard, the kirk yard,
Wi' flowr's o' every hue;
Shelter'd by the holly's shade,
And the dark sombre yew.
The settin' sun, the settin' sun,
How glorious it gaed doun;
The cloudy splendour raised our hearts
To cloudless skies aboon.
The auld dial, the auld dial,
It tauld how time did pass;
The wintry winds hae dang it doun,
Now hid 'mang weeds and grass.